birat ribon

कोरोना सङ्क्रमित भारतीय नागरिकसहित तीन जनाको मृत्यु

Neuro
कोरोना सङ्क्रमित भारतीय नागरिकसहित तीन जनाको मृत्यु

विराटनगर / उपचारका लागि छुट्टाछुट्टै अस्पतालमा भर्ना गरिएका भारतीय नागरिकसहित तीन जनाको कोरोना भाइरस सङ्क्रमणका कारण मृत्यु भएको छ ।

मृतकमध्ये भारतीय नागरिक पुरुष हुन् भने अरु दुई जना वृद्धा महिला हुन् । भारतीय नागरिकको मोरङको बूढीगङ्गा गाउँपालिकास्थित विराट शिक्षण अस्पतालमा आइतबार बिहान ७ः१० बजेतिर मृत्यु भएको हो । विराटनगर र सुनसरी ठेगाना भएका दुई वृद्धा महिलाको विराटनगरस्थित कोसी अस्पताल कोभिड–१९ उपचार केन्द्रमा आइतबार बिहान र शनिबार राति मृत्यु भयो ।

cura insider

नेपालसँग सिमाना जोडिएको भारत जोगवनीका ३० वर्षीय पुरुषको उपचारका क्रममा मृत्यु भएको विराटका कोभिड अस्पताल इन्चार्ज सुनिल देवले जानकारी दिए । अस्पतालले प्राप्त गरेको जानकारी अनुसार व्यापारको सिलसिलामा जोगवनीबाट नेपाल आएका उनी आफन्तको घरमा बस्दै आएका थिए ।

कोरोना पुष्टि भएपछि उनलाई वैशाख १० गते उपचारका लागि भर्ना गरिएको थियो । मृतकमा निमोनियाको पुरानै समस्या रहेको देवले बताए । मृतकको शव व्यवस्थापन कसरी गर्नेभन्ने विषयमा सरोकारवाला निकायसँग समन्वय भइरहेको उनको भनाइ छ ।

कोसी अस्पताल कोभिड–१९ उपचार केन्द्रमा विराटनगर महानगरपालिका–६ की ६८ वर्षीया वृद्धाको आइतबार बिहान ६ः४० बजेतिर मृत्यु भएको छ । कोभिड अस्पतालका सूचना अधिकारी अनुपम राजवंशीका अनुसार कोरोना पुष्टि भएपछि वृद्धालाई वैशाख १६ गते उपचारका लागि अस्पताल भर्ना गरिएको थियो ।

त्यस्तै सुनसरी ठेगाना भएकी ६० वर्षीया वृद्धा महिलाको शनिबार राति ९ बजेतिर मृत्यु भएको उनले बताए । राजवंशीका अनुसार शनिबार नै उपचारका लागि भर्ना गरिएको थियो । दुवै मृतकको शव व्यवस्थापनका लागि पहल भइरहेको उनले बताए ।

jackson ribon

प्रतिक्रिया दिनुहोस्: