birat ribon

१६ महिनादेखि बिक्री भएनन् ओलाङचुङ्गोलाका गलैँचा

Neuro
१६ महिनादेखि बिक्री भएनन् ओलाङचुङ्गोलाका गलैँचा

ताप्लेजुङ / ताप्लेजुङ फक्ताङलुङ गाउँपालिका–७ ओलाङचुङ्गोलामा उत्पादित गलैँचा १६ महिनादेखि नाकाबन्दले गर्दा बिक्री भएको छैन । ओलाङचुङ्गोलामा उत्पादन भएको गलैँचाको प्रमुख बजार चीनका विभिन्न बजारमा खपत हुँदै आएकोे छ ।

सो क्षेत्रका स्थानीय प्रमुख पेशाका रुपमा गलैँचा उत्पादन गर्ने गर्दछ । समुन्द्र सतहदेखि तीन हजार दुई सय मिटर उचाइमा रहेको ओलाङचुङ्गोला हिमाली क्षेत्र भएकाले खेतीपाती हुँदैन । यहाँका समुदायले पशुपालन र गलैँचा उत्पादन गरेर जीविकोपार्जन गर्दै आएको छ ।

cura insider

हिमाली बस्ती ओलाङचुङ्गोला, याङ्मा, घुन्सा र फले क्षेत्रका समुदायको पुख्र्यौली पेशाका रुपमा प्रत्येक घरपरिवारमा गलैँचा बुन्ने काम गर्दै आएको फक्ताङलुङ–६ टाँसी तेञ्जिङ शेर्पाले जानकारी दिए ।

लामो समयसम्म ओलाङचुङ्गोलाको टिप्ताला नाकाबन्द खुल्न सकेको छैन । नाकाबन्द हुँदा १६ महिनादेखि उत्पादन गरेको गलैँचा घरमै थन्क्याएर राख्नुपरेको स्थानीय तेञ्जिङ वालुङले बताए ।

उनले भने, ‘लामो समयसम्म पनि नाका खुल्न सकेन । घरमा उत्पादन गरेको गलैँचा सदरमुकाम फुङ्लिङ बजारमा लगेएर बिक्री गर्‍यो भने आफूले परिश्रम गरेको र लागत पनि उठान मुस्किल पर्दछ ।’ लकडाउनका समयमा बुनेको ५० थान गलैँचा घरमै थन्काएर राखेको लामा भुजुङ शेर्पाले जानकारी दिए ।

एउटा गलैँचाको मूल्य १५ हजारदेखि २७ हजारसम्ममा चीनमा बिक्री हुने उनले बताए । सरदर हिसाब गर्ने हो भने नौ लाख ५० हजार बराबरको गलैँचा घरमै थन्क्याइएको छ ।

नाकाबन्दले गलैँचा बिक्री हुन नसकेर ओलाङचुङ्गोलामा प्रत्येक घरमा ३० थानको हाराहारीमा गलैंचा थन्काएर राख्न बाध्यता भएको फक्ताङलुङ–७ का वडाध्यक्ष छेतेन भोटेले बताए ।

उनले भने, ‘ओलाङचुङ्गोला गोलाका प्रमुख आयस्रोत गलैँचा हो । त्यही गलैँचा १६ महिनादेखि नाकाबन्दले घरमै थन्क्याएर बस्नुपरेको छ ।’ आफूले उत्पादन गरेको गलैँचा बिक्री हुन नसकेपछि दैनिक जीविकोपार्जन गर्न समस्या भएको भोटेले बताए ।

ओलाङचुङ्गोलाको टिप्ताला नाका हुँदै निर्यात हुने नेपाली उत्पादनमा ओलाङचुङ्गोलामा उत्पादन भएको गलैँचा पनि एक भएको व्यापारी तावा च्युङदाक शेर्पाले बताए । लामो समयसम्म पनि नाका खोल्ने दुईतर्फ सम्झौता भएको छैन । सरकारको निर्णयानुसार गृह मन्त्रलयले गत हप्ता जिल्ला प्रशासन कार्यालयमा नाकामा आवतजावत गर्न स्थानीयलाई दिनु भनी परिपत्र भएको छ । सीमा सुरक्षा प्रहरी चौकीदेखि पास लिएर आवतजावत गर्न पाउँने जनाइएको छ ।

गृह मन्त्रलयले नाकाका विषयमा परिपत्र भए पनि एक पक्षले मात्र निर्णय गरेर नहुने चीन मामिला जानकार राख्ने तथा फक्ताङ्लुङ गाउँपालिका प्रवक्ता छेतेन लामाले बताए । सीमा तथा नाकाजस्तो सम्वेदनशील क्षेत्रमा दुई देशको निर्णयमा मात्र सम्भव हुने उनी बताउँछन् । आवश्यक परेमा खाद्य सामग्री चीनले ल्याएर सीमा क्षेत्र छोडिदिनसक्ने चीनका अधिकारीले बताएको उनले जानकारी दिए ।

नेपालको उत्पादन भएको वस्तु भने चीन निर्यात नहुने जनाइएको छ । नेपालको सामग्री निर्यात नहुने भएपछि ओलाङचुङ्गोलाको गलैँचा घरमै थन्क्याएर राख्नुपर्ने टुङ्गो नएको स्थानीय बताउँछन् । नेपालतर्फबाट नाकाको खुल्ने भए पनि चीनतर्फबाट तत्काल नाका नखुलाउने सङ्केत दिएको लामाले बताए । अझ लामो समयसम्म नाका खुल्न सकेन भने ओलाङचुङ्गोलालगायत हिमाली बस्तीमा खाद्य सामग्रीको अभव हुने लामाले बताए । रासस

jackson ribon