birat ribon

जेलबाट तस्कर छुटाउन अर्कैको अपहरण, बन्धक बनाएर धरौटी रकमको ‘बार्गेनिङ’

Neuro
जेलबाट तस्कर छुटाउन अर्कैको  अपहरण, बन्धक बनाएर धरौटी रकमको ‘बार्गेनिङ’

विराटनगर / विराटनगरमा भएको एउटा अपहरण घटनाको अनुसन्धान गर्दा नयाँ तथ्य फेला परेको छ ।

cura insider

तस्करीको अभियोगमा कारागारमा थुनामा रहेकी महिलालाई छुटाउन आवश्यक पर्ने धरौटीवापतको रकम असुल्न विराटनगरका एक युवाको अपहरण भएको पाइएको हो । अपहरणमा परेका युवा पनि विगतमा तस्करी धन्दामै संलग्न रहेको प्रहरीको प्रारम्भिक अनुसन्धानले देखाएको छ ।

कपडा लिएर काठमाडौंतर्फ जाँदै गरेको ना ६ ख ८३१२ नम्बरको ट्रकलाई सुनसरीको इटहरी उपमहानगरपालिका–५ मा गत असार २९ गते इटहरीस्थित राजस्व अनुसन्धान कार्यालयले नियन्त्रणमा लियो । अनुसन्धानबाट नक्कली बिलविजकको प्रयोग गरेर कपडा ओसारपसार भइरहेको पुष्टि भयो । कपडाको अवैध कारोबार र तस्करीमा संलग्नको खोजी हुँदा विराटनगर महानगरपालिका–१८ खोक्साका २३ वर्षीय सुभाष कामत पक्राउ परे ।

उनीमाथि अनुसन्धान गर्दा तस्करीमा विराटनगर–६ का ५८ वर्षीय दीपक शर्मा, उनकी श्रीमती ५६ वर्षीया मञ्जु शर्मा र छोरी २८ वर्षीया रीमा पासवानसमेतको संलग्नता पुष्टि भएको कार्यालयका प्रमुख दीपक खड्काले जानकारी दिए । त्यसपछि कात्तिक १७ गते मञ्जु पक्राउ परिन् । उनका श्रीमान दीपक र छोरी रीमा फरार बने ।

राजस्व कार्यालयले पक्राउ परेका दुईसहित चारै जनालाई प्रतिवादी बनाउँदै उच्च अदालत विराटनगरमा गत मंसिर १८ गते राजस्व चुहावट मुद्दा दर्ता गर्यो । प्रमुख खड्काका अनुसार मुद्दामा ६३ लाख ५७ हजार दुई सय २७ रुपैयाँ ५८ पैसा विगो मागदाबी गरिएको थियो ।

अदालतले पक्राउ परेका प्रतिवादीलाई प्रतिव्यक्ति १०÷१० लाख रुपैयाँ धरौटी लिएर छाड्न आदेश दियो । सुभाष धरौटीवापतको पैसा बुझाएर छुटे पनि धरौटी रकम बुझाउन नसक्दा मञ्जु भने जेलमा पुगिन् । उनी अहिले पनि कारागारमै थुनामा छिन् ।

तर अदालतले तोकेको धरौटी रकम बुझाएर छुटेका सुभाष शनिबार दिउँसो विराटनगरबाट अचानक अपहरणमा परे । प्रहरीका अनुसार जेलमा परेकी मञ्जुलाई छुटाउनलाई धरौटीवापतको रकम तिरिदिन उनका श्रीमानसहित तस्करको समूहले सुभाषलाई बारम्बार दबाब दिएको खुलेको छ । तर धरौटीवापत १० लाख रुपैयाँ तिरिदिने आफ्नो हैसियत नभएको बताएपछि सुभाषसँग तस्कर समूह क्रुद्ध बन्यो ।

एक प्रहरी अधिकारीका अनुसार पाँच जना तस्करको समूहले सुभाषको सुराकी र सूचनाका आधारमा मञ्जु जेलमा परेको निस्कर्ष निकाल्यो । जेलबाट मञ्जुलाई कसरी छुटाउने भन्ने कुराको छलफल भएपछि उक्त समूहले धरौटीवापत तिर्नुपर्ने पैसा असुल्ने योजना बनाएर नियन्त्रणमा लिँदै सुभाषको अपहरण गरेको पुष्टि भएको मोरङ प्रहरी प्रमुख एसपी सन्तोष खड्काले बताए । उनका अनुसार उक्त योजना मञ्जुका श्रीमान दीपक, विराटनगर–१६ दरैयाका २० वर्षीय रोहित पण्डित, ३२ वर्षीय सिकेन्द्र यादव, २१ वर्षीय अजय यादव र विराटनगर–६ रामपुरकी २८ वर्षीया सन्ध्या शर्माले बनाएका हुन् ।

त्यही योजना अनुसार शनिबार दिउँसो १ः३० बजेतिर घर छेउबाटै को ३२ प ३९४३ नम्बरको मोटरसाइकलमा रहेका सुभाषको अपहरण भएको एसपी खड्काले बताए । मोटरसाइकलसहित उनलाई सन्ध्याको घरमा पुर्याएर बन्धक बनाइयो । अपहरणपछि सुराकी दिएर मञ्जुलाई जेल पुर्याएको भन्दै उनलाई थुनामुक्त गर्न आवश्यक पर्ने रकम तिरिदिन सुभाषलाई दबाब दिएको खुलेको छ ।

तर तिर्न नसक्ने बताएपछि उनीमाथि कुटपिट गर्दै परिवारका सदस्यसँग उक्त रकमको ‘बार्गेनिङ’ गर्न थालिएको खड्काले बताए । उनका अनुसार सुरुमा सुभाषका भाइ विकास कामतलाई फिरौती माग गर्दै फोन गएको थियो । दाईलाई नियन्त्रणमा राखिएको भनेर १० लाख रुपैयाँ मागेको गिरोहले नदिए मारिदिने धम्की दिन थालेपछि विकासले घटनाका बारेमा प्रहरीलाई जानकारी गराएको खड्काको भनाइ छ ।

‘अपहरण गरेर फिरौती माग गरिएको खबर आउनसाथ खोजीका लागि विशेष टोली परिचालन गरियो,’ खड्काले भने, ‘दुई घण्टाभित्र सकुशल उद्धार पनि गर्न प्रहरी सफल भयो ।’ तर कुटपिटका कारण शरीरका विभिन्न भागमा चोट लागेका कारण सुभाषको कोसी अस्पतालमा प्राथमिक उपचार गरिएको खड्काले बताए ।

उनका अनुसार प्रहरीले खोजतलास सुरु गरेको जानकारी पाएपछि सुरुमा सन्ध्याको घरमा बन्धक बनाएर कुटपिट गर्दै यातना दिइरहेको समूहले सुभाषलाई त्यसपछि दीपक शर्माको घरमा पुर्याएको खुलेको छ । दीपकको घरमा पनि बन्धक बनाएर परिवारका सदस्यसँग बारम्बार फिरौती माग गरिएको एसपी खड्काको भनाइ छ । तर प्रहरीले खोजी तीव्र पारेको जानकारी पाएपछि असुरक्षित महसुस गरेको त्यो समूहले सुभाषलाई भारततिर पुर्याउने योजना बनाएको खुलेको छ ।

भारततिर लैजाँदै गर्दा उनलाई विराटनगर–१२ बखरीबाट उद्धार गरिएको जानकारी एसपी खड्काले दिए । ‘सबैतिर सर्च अभियान चलाएर खोजी तीव्र पारिएका कारण अपहरणकारीलाई पक्राउ गर्न सकियो,’ उनले भने, ‘केही ढिला भएको भए भारत पुर्याउने थिए वा जे पनि गर्नसक्ने अवस्था रहेको देखिन्छ ।’ प्रहरी टोली देख्नसाथ उनलाई त्यहीँ छाडेर अपहरणकारीको समूह फरार बनेको थियो ।

तर आइतबारसम्ममा प्रहरीले तीन जनालाई नियन्त्रणमा लिइसकेको छ । दुई जना फरार छन् । मोरङ प्रहरीका प्रवक्ता डीएसपी मानबहादुर राईका अनुसार अपहरणकारीको समूहले बन्धक बनाएर राख्दै सुभाषको परिवारका सदस्यलाई फोनमार्फत रकमको ‘बार्गेनिङ’ गर्न थालेको हो । मञ्जुलाई जेलबाट छुटाउन १० लाख चाहिने भएकाले त्यति रकम फिरौतीवापत दिए मात्र सुभाषलाई सकुशल छाडिदिने धम्की परिवारका सदस्यलाई दिइएको राईले बताए ।

राईका अनुसार सुभाषलाई सकुशल उद्धार गर्दै अपहरणमा संलग्नमध्ये रोहित, अजय र सन्ध्यालाई पक्राउ गरिएको छ । उनका अनुसार रोहितलाई शनिबार राति उनकै घरबाट र आइतबार बिहान अजयलाई विराटनगर–१२ बखरी तथा सन्ध्यालाई विराटनगर–१ पोखरीयाबाट नियन्त्रणमा लिइएको हो ।

डीएसपी राईले घटनामा संलग्नमध्ये मञ्जुका श्रीमान दीपक र सिकेन्द्र फरार रहेका कारण खोजी तीव्र पारिएको जनाए । उनले फरार रहेका दुई जना पनि चाँडै पक्राउ पर्ने जानकारी दिए । ‘लुकेर बसेको स्थानका बारेमा केही सुराक आइसकेको छ,’ उनले भने, ‘जतिसक्दो चाँडो पक्राउ गरेर कारबाहीको दायरामा ल्याइने छ ।’ डीएसपी राईले अपहरणका पछाडि अरु पनि कारण छन् कि भनेर गम्भीर ढंगले अनुसन्धान थालिएको जनाए । तर अपहरणकारी र अपहरणमा परेका व्यक्ति कपडा लगायतका मालवस्तुको तस्करीमा लामो समयदेखि संलग्न गिरोह रहेको पुष्टि भएको उनको भनाइ छ ।

पक्राउ परेकाहरुविरुद्ध अपहरण तथा शरीर बन्धक मुद्दा चलाउन आइतबार अदालतबाट म्याद थप गरेर घटनाका बारेमा विस्तृत अनुसन्धान सुरु गरिएको जानकारी डीएसपी राईले दिए ।

jackson ribon