Rumpum Advertisement

सुवास फेरि मगमगाउला कि नाइँ

Neuro
सुवास फेरि मगमगाउला कि नाइँ

राजनीतिक पण्डित, नागरिक–समाजका अगुवा अनि कानुनका धेरैजसो विद्यार्थीहरूले संसद् विघटनलाई गैरसंवैधानिकमात्र होइन ‘ओलीगमन’ यात्राको बिर्सनलायक नजिर मानेका छन् ।

तर कन्टिर–बाबू भने यस मुद्दामा बडो सकसमा छन्– कति बोल्ने के बोल्ने ? उनी हिन्दी भाषाको पुरानो सिनेमा ’कसौटी’ र त्यसको सदावहार पात्र प्राणलाई सम्झिँदै एउटा गीतको पङ्क्ति गुनगुनाउँछन्, ‘… हम तो कुछ नही बोलेगा, हम बोलेगा तो बोलोगो कि बोलता है !’

त्यसो त उनी बोल्या–बोल्यै छन् । अरूहरूले पनि बोल्या छन् । सबैले आफ्ना तालुकवालाको तालुको सेवा गरेकै छन् । ओल्बालाई कसैले ठीक त कसैले बेठीक भनेका छन्, भन्दै छन् ।

तर ती नेवाङ थरका एकजना इलामे छन् नि, तिनी अहिले बडो सकसमा छन् । उनी नाम चलेकै वकिल पनि हुन् भन्ने कन्टिर–बाबूलाई थाहा छ । विचरालाई संविधानबारे कानुनी र संवैधानिक धारणा व्यक्त गर्न उनीमाथि बडो दवाब छ । संविधानसभाका सभामुख हुँदा अहिलेको संविधान विश्वकै उत्कृष्टमध्येको एक हो भनेर दावी गर्ने यिनै हुन् । प्रधानमन्त्रीले संसद् विघटन गर्न सक्दैनन् भनेर विगतमा शायद यिनले पनि कतै भनेका हुन् ।

तर सामाजिक सञ्जालमा अहिले विचराको उछित्तो काढिएको देखेर कन्टिर–बाबू उदेक छन् । हरे राम … ! हेर आफैँले बोलेको कुरा अहिले आफैँलाई काउसो । कन्टिर–बाबूलाई पनि सामाजिक सञ्जालको बहस रुचिकर लागेको छ ।

हो रहेछ, सुवास साँच्चिकै सुवास भइदिँदा कसैगरी लुक्न सक्दैन रहेछ । विगतको सुवास अहिले चारैतिर मगमगिएको हो ।

कन्टिर–बाबू नेवाङजीको पिरलोको अनुमान त गर्न सक्छन् तर चुकचुकाउनुबाहेक अर्थोक केही गर्न सक्दैनन् । विचरा, ठूलो धर्मसङ्कटमा छन् । संसद् विघटनको, समर्थन गरौँ संविधानको मर्म मर्ने, विरोध गरौँ ओल्बाको बक्र–दृष्टिमा परिने ।

यस्तो बेलामा के गर्नु उचित होला नेवाङ सर ? कन्टिर–बाबूलाई कुनै आइडिया फुरिरहेको छैन !