Rumpum Advertisement

अमेरिकाको तेस्रो शक्तिसाली पदमा न्यान्सी पेलोसी निर्वाचित

Neuro
अमेरिकाको तेस्रो शक्तिसाली पदमा न्यान्सी पेलोसी निर्वाचित

विराटनगर । अमेरिकामा राष्ट्रपति र उपराष्ट्रपतिपछिको तेस्रो शक्तिसाली पद मानिने सभामुख चयन गरिएको छ ।

संसद बैठकले सभामुखमा ८० वर्षीया न्यान्सी पेलोसीलाई पुनः निर्वाचित गरेको हो । उनलाई आइतबारबाट सुरु भएको अमेरिकी तल्लो सदन हाउस अफ रिप्रिजेन्टेटिभले सभामुखमा निर्वाचिन गरेको छ । सभामुख अमेरिकामा राष्ट्रपति र उपराष्ट्रपतिपछिको शक्तिशाली पद हो । राष्ट्रपति र उपराष्ट्रपतिले काम गर्न नसक्ने अवस्था भएमा सभामुख नै अमेरिकी राष्ट्रपति हुने प्रावधान छ।

सभामुखमा निर्वाचिन बनेकी पेलोसी १७ वर्षदेखि हाउस अफ रिप्रिजेन्टेटिभमा डेमोक्रेटिक पार्टी नेता रहँदै आएकी छिन् । गत नोभेम्बर ३ मा माथिल्लो सदन सिनेटका लागि एक सयमध्ये ३५ सिटमा निर्वाचन भएको थियो भने तल्लो सदनका सबै सिटमा निर्वाचन भएको थियो। निर्वाचित सांसदहरुले आइतबार नै सपथग्रहण गरेका छन्।

सिनेट र हाउस अफ रिप्रिजेन्टेटिभमा केही सिटहरु भने अझै पूर्ति हुन बाँकी रहेको छ। जनवरी ५ मा जर्जियामा हुने निर्वाचनले २ जना सिनेटरको संख्या पूर्ति गर्नेछ। नोभेम्बर ३ को चुनावपछि सिनेटमा ४८ जना डेमोक्र्याट्स र ५० जना रिपब्लिकन सांसद रहेका छन्।

त्यस्तै हाउस अफ रिप्रिजेन्टेटिभमा न्युयोर्कको २२ औं डिस्ट्रिक्टबाट सांसदको संख्या पूर्ति हुन बाँकी रहेको छ। मतान्तर निकै कम भएपछि त्यहाँ अदालतले पुनः मतगणनाको आदेश दिएको छ। त्यस्तै आयोवाको सेकेण्ड डिस्ट्रिक्टमा पनि झिनो मतान्तर रहेपछि विवाद रहेको छ ।

अब जनवरी ६ मा संसदको संयुक्त सदनले राष्ट्रपतिका लागि इलेक्टोरल मतहरु औपचारिक रुपमा गणना गर्नेछ। माइक पेन्सको अध्यक्षतामा यो काम हुनेछ।