Rumpum Advertisement

संवैधानिक परिषद् बैठकमा काङ्ग्रेस सहभागी हुँदैन : नेता केसी

Neuro
संवैधानिक परिषद् बैठकमा काङ्ग्रेस सहभागी हुँदैन : नेता केसी

पोखरा/ नेपाली काङ्ग्रेसका केन्द्रीय सदस्य अर्जुननरसिंह केसीले यथास्थितिमा काङ्ग्रेस संवैधानिक परिषद्को बैठकमा सहभागी नहुने बताएका छन् ।

बुधबार नेपाल प्रेस युनियन कास्कीले पोखरामा आयोजना गरेको पत्रकार सम्मेलनमा उनले संवैधानिक निकाय विधि र विधानसँग मात्र उत्तरदायी, स्वतन्त्र र निष्पक्ष हुनुपर्ने मान्यतामा कार्यपालिका, व्यवस्थापिका र न्यायपालिकाका प्रमुख र प्रमुख प्रतिपक्षको नेतालाई सम्मिलित गरेर संवैधानिक परिषद्को व्यवस्था गरिएको बताए ।

संवैधानिक परिषद्मा छजनाको व्यवस्थासहित चारजनाको कोरम पुर्‍याउने र निर्णय सर्वसम्मत गर्ने व्यवस्था तोडेर आएको अध्यादेशले प्रजातान्त्रिक मूल्यमान्यता र लोकतन्त्रका आधारभूत संस्थालाई कमजोर बनाएको उनले बताए ।

पार्टीका पूर्वसहमहामन्त्री केसीले जनताले काङ्ग्रेसलाई ५ वर्ष प्रमुख प्रतिपक्षको भूमिका दिएकाले सरकारमा सहभागी नहुने स्पष्ट पारे ।

काङ्ग्रेसका लागि १४औँ महाधिवेशन सम्पन्न गर्नु प्रमुख जिम्मेवारी रहेको बताउँदै उनले एकरडेढ वर्षभित्र विधिवत् अधिवेशन गर्ने गरी पुरानै महाधिवेशनबाट निर्वाचित सदस्यबाट फागुनभित्रमै महाधिवेशन सम्पन्न गर्ने बारेमा सोच्नुपर्ने आवश्यकता रहेकाले आफूले केन्द्रीय समिति बैठकमा प्रस्ताव लैजान लागेको जानकारी दिए । रासस