Rumpum Advertisement

प्रदेश १ का तीन मन्त्रालयले सीपमुलक तालिमलाई एकरुपता दिने

प्रदेश १ का तीन मन्त्रालयले सीपमुलक तालिमलाई एकरुपता दिने

विराटनगर, ११ मंसिर । प्रदेश १ का तीनवटा मन्त्रालयले सञ्चालन गर्ने सीपमुलक तालिमलाई एकरुपता दिने भएका छन् ।

सीपमुलक तालिम सञ्चालन गर्दा दोहोरोपना हुन नदिनका लागि तालिमलाई एकरुपता दिनेगीि मन्त्रालयबीच छलफल सुरु भएको छ ।

बिहीबार सामाजिक विकास मन्त्री जीवन घिमिरेको अध्यक्षतामा भूमि व्यवस्था कृषि तथा सहकारी मन्त्रालय र उद्योग पर्यटन वन तथा वातावरण मन्त्रालयबीच छलफल भएको हो ।

सामाजिक विकास मन्त्रालयको श्रम तथा रोजगार शाखाका शाखा अधिकृत प्रदीप गौतमले प्रदेशस्तरमा उद्यमशिलतासम्बन्धी तालिम सञ्चालन गर्दा दोहोरोपना आउने गरेकाले त्यसलाई हटाउनेगरी तीन वटा मन्त्रालयबीचमा छलफल गरिएको बताए ।

चालु आर्थिक बर्ष २०७७–०७८ मा तीन वटै मन्त्रालय, संघको सशर्त र प्राविधिक शिक्षा तथा व्यवसायिक तालिम परिषद् ( सिटिईभीटी) ले तालिमका लागि करिब ३० करोड बजेट विनियोजन भएको उनले बताए ।

कोरोना संक्रमणका कारण सबै तालिम सञ्चालन गर्न नसकिने र सञ्चालित तालिममा पनि दोहोरोपना हटाउन र पारदर्शीताका लागि छलफल शुरु गरिएको उनको भनाइ छ ।

आजको छलफलले सामाजिक विकास मन्त्रालयको संयोजकत्वमा तीनवटै मन्त्रालयको महाशाखा प्रमुख सदस्य रहनेगरी कार्यदल गठन गरिएको छ । कार्यदललाई तालिम सञ्चालनको खाँका तयार गर्ने जिम्मेवारी दिइएको छ ।

कार्यदलको सुझाव अनुसार नीतिगत रूपमा कार्यक्रम सञ्चालनको मार्गदर्शन तयार गरिएको श्रम तथा रोजगार शाखाका अधिकृत गौतमले बताए ।