Rumpum Advertisement

संक्रमण दर बढ्यो, आईसीयू र भेन्टिलेटर अभाव

संक्रमण दर बढ्यो, आईसीयू र भेन्टिलेटर अभाव

कैलाली, ५ मंसिर । कोरोना संक्रमणको दर बढ्दै जाँदा आईसीयु र भेन्टिलेटरको अभाव हुँदै आएको छ ।

सुदूरपश्चिम प्रदेश र संघीय सरकारले कैलालीको टीकापुर अस्पताललाई भेन्टिलेटर उपलब्ध गराए पनि जनशक्ति उपलब्ध गराउन नसक्दा अस्पताल आफैंले आईसीयू र भेन्टिलेटर सञ्चालनका लागि पहल सुरु गरेको छ ।

चालू आर्थिक वर्षमा संघीय सरकारले टीकापुर अस्पताललाई चारवटा भेन्टिलेटर खरिदका लागि रकम पठायो भने सुदूरपश्चिम प्रदेश सरकारले दुईवटा भेन्टिलेटर खरिद गरेर पठाएको छ । एकवटा भेन्टिलेटर यूएनडीपीले अस्पताललाई सहयोग गरेको अस्पतालमा उपकरण भएर पनि जनशक्ति नहुँदा आएका उपकरणलाई प्रयोगमा ल्याउन नसकिएको अस्पतालका अध्यक्ष दीपक रावलले बताएका छन् ।

‘अहिले टीकापुर अस्पतालसँग सातवटा भेन्टिलेटर छन् तर, आईसीयूका लागि एकजना दक्ष जनशक्तिसमेत अस्पतालसँग छैन,’ अध्यक्ष रावलले भने, ‘अहिले बिरामीको आईसीयू र भेन्टिलेटर नपाउँदा ज्यान जाने गरेको छ । हामीले त्यसैलाई मध्यनजर गर्दै अबको दुई महिनाभित्र आईसीयू र भेन्टिलेटर सञ्चालन गर्ने गरी स्थानीय तहसँग समन्वय सुरु गरेका छौँ ।’

अध्यक्ष रावलले टीकापुर नरगपालिका, जानकी गाउँपालिका, जोशीपुर गाउँपालिका, भजनी नगरपालिका र महुन्याल गाउँपालिकासँग छलफल भएको बताएका छन् । उनले दश बेडको आईसीयू र सात बेडको भेन्टिलेटर सञ्चालनका लागि पूर्वाधार अस्पतालसँग भए पनि आवश्यक पर्ने जनशक्तिका लागि भने आर्थिक अभाव भएका कारण स्थानीय तहसँग छलफल गरिएको बताए ।

अस्पतालका मेडिकल सुपरिटेन्डेन्ट डा. रेमकुमार राईले आईसीयू तथा भेन्टिलेटर सञ्चालनका लागि एकजना एनेस्थेसियालोजिष्टसहित ३२ जना थप कर्मचारी व्यवस्थापन गर्नुपर्ने भन्दै त्यसका लागि करिब दुई करोड ३७ लाख ५५ हजार ८०० अनुमानित खर्च हुने बताए ।

राईले उपकरणमात्र भएर सेवा सञ्चालन गर्न नसकिने भन्दै जनशक्तिका लागि आर्थिक पाटोसक्षम भए आईसीयू सञ्चालन गर्न कुनै समस्या नरहेको बताएका छन् । उनले आईसीयू सञ्चालन हुँदा टीकापुरका लागि मात्र नभई आसपासका क्षेत्रलाई समेत महत्वपूर्ण टेवा पुग्ने बताए ।

अस्पताल विकास समितिको समन्वयमा भएको सर्वदलीय छलफलमा अस्पतालमा आईसीयू तथा भेन्टिलेटर सञ्चालनका लागि स्थानीय तह सकारात्मक देखिएका छन् । भजनी नगरपालिकाकी उपप्रमुख छाया देवकोटाले कोरोना भाइरसको संक्रमण बढ्दै जाँदा बिरामीले अस्पतालमा बेड पाउने अवस्था नरहेको बताउँदै यो समयमा आईसीयू स्थापना प्रस्ताव महत्वपूर्ण रहेको बताएका छन् ।

त्यस्तै, जोशीपुर गाउँपालिकाका अध्यक्ष रामकृष्ण चौधरीले गाउँपालिकामा चालू आवमा सबैभन्दा कम बजेट आएको बताउँदै आईसीयू सञ्चालनका लागि सक्दो सहयोग गर्ने बताए । टीकापुर नगरपालिकाका नगर प्रमुख तपेन्द्रबहादुर रावलले आईसीयू सञ्चालनका लागि टीकापुर नगरपालिकाले अग्रपंक्तिमा रहेर सहयोग गर्ने बताउँदै एउटै स्थानीय तहले मात्र चाहेर आईसीयू सञ्चालन गर्न सम्भव नरहेको बताए ।

छलफलमा सुदूरपश्चिम प्रदेश सभा सदस्य एवं प्रमुख प्रतिपक्षी दलका नेता रणबहादुर रावलले सरकारले नै स्वास्थ्य शिक्षालाई प्राथमिकता दिएको अवस्थामा सबै स्थानीय तह मिलेर संघ र प्रदेशलाई दबाब दिनै भए पनि आईसीयू सञ्चालन गर्न सुझाव दिएका छन् ।

सुदूरपश्चिम प्रदेशको मातहतमा रहेको टीकापुर अस्पतालमा आवश्यक भौतिक पूर्वाधार भएर पनि जनशक्तिको अभावमा बिरामीलाई नेपालगञ्ज, धनगढी रेफर गर्नुपर्ने बाध्यता रहँदै आएको छ । कैलालीको आधाभन्दा बढी स्थानीय तह र बर्दियाको आधाभन्दा बढी स्थानीय तहका नागरिक उपचारका लागि टीकापुर अस्पतालमा आउने गर्दछन् । रासस

प्रतिकृया दिनुहोस्:

तपाईको ईमेल गोप्य राखिनेछ