birat ribon

प्रशासनद्वारा धार्मिक क्रियाकलापमा रोक

Neuro
प्रशासनद्वारा धार्मिक क्रियाकलापमा रोक

खोटाङ, ५ कात्तिक । कोरोना भाइरसको संक्रमण फैलिन नदिन जिल्ला प्रशासन कार्यालयले विभिन्न धर्मावलम्बीका धार्मिकस्थलमा हुने पूजा, प्रार्थना तथा भजनकीर्तन गर्न रोक लगाएको छ ।

दशैँतिहार तथा छठपर्वको अवसरमा मठमन्दिर, शक्तिपीठ, पण्डाल, मस्जिद, गुम्बा र चर्चमा भीडभाड हुँदा संक्रमण फैलिने जोखिम देखिएको भन्दै प्रशासनले धार्मिकस्थलमा पूजा, प्रार्थना, भजनकीर्तन, रथयात्रा, कलशयात्रा, बलिपूजा, मूर्ति विसर्जनलगायतका क्रियाकलाप गर्नमा रोक लगाएको हो ।

cura insider

प्रमुख जिल्ला अधिकारी शालिग्राम शर्मा पौडेलले आज जारी गरेको सूचनामा मठमन्दिर, शक्तिपीठ, पण्डाल, मस्जिद, गुम्बा र चर्चमा नित्य पूजाआजाबाहेक भीडभाडका बीचमा गरिने धार्मिक क्रियाकलाप नगर्न आग्रह गरिएको छ ।

यस्तै चाडपर्वका अवसरमा सामूहिकरूपमा भेला, जम्मा भई गरिने शुभकामना आदानप्रदान, चियापानजस्ता कार्य नगर्न, सामूहिकरूपमा कार्यक्रम आयोजना गरी गरिने शिलान्यास, उद्घाटन, प्रशिक्षण, सभासम्मेलन, गोष्ठी, तालिम, सेमिनार, प्रदर्शन, समूहमा खेलिने खेलकुद, खेलमैदानमा हुने प्रस्तुतिजस्ता कार्यक्रम नगर्न सूचित गरिएको छ ।

प्रशासनले दशैँ, तिहार, छठजस्ता चाडबाडलाई घरैमा बसी परिवारभित्र मात्र मनाउन, जिल्लाभरि साँझ ८ः०० देखि बिहान ५ः०० बजेसम्म राजमार्गमा चल्ने लामो दूरीका सवारीसाधनबाहेकका यातायात सञ्चालन नगर्न, हिँडडुल र बजार बन्द गर्न भनेको छ ।

यस्तै आवतजावत तथा हिँडडुल गर्दा सबै यात्रु तथा चालक, सहचालक एवम् सवारीधनीले नेपाल सरकार भौतिक पूर्वाधार तथा यातायात मन्त्रालयबाट जारी भएको सार्वजनिक यातायात सञ्चालन निर्देशिकाबमोजिम सवारीमा सवार गर्ने तथा सवारीसाधन सञ्चालन गर्ने, शैलुन, ब्यूटीपार्लर हाललाई सञ्चालन नगर्न भनिएको छ ।

गृह मन्त्रालय, आन्तरिक मामिला तथा कानुन मन्त्रालय प्रदेश नं १ विराटनगरबाट प्राप्त निर्देशनअनुसार स्वास्थ्य सुरक्षा सतर्कताबारे सूचना जारी गरिएको प्रजिअ पौडेलले जानकारी दिए । कोरोना संक्रमण दर बढिरहेका बेला जिल्लामा स्वास्थ्य सुरक्षा सावधानी भने घटिरहेको पाइएको छ । रासस

jackson ribon