प्रदेश १ मा १ लाख जनाको पीसीआर परीक्षण : चार हजार पोजिटिभ, ४३ को मृत्यु

विराटनगर, २२ भदौ । प्रदेश १ मा १ लाख बढीको पीसीआर परीक्षण भएको छ । प्रदेश एकको सामाजिक विकास मन्त्रालयले दिएको जानकारी अनुसार सोमबारसम्म १ लाख ३४८ जनाको पीसीआर परीक्षण भएको छ ।

आज १ हजार ८६० जनाको पीसीआर परीक्षण भएको छ । हालसम्म परीक्षण गरिएकामध्ये ९६ हजार १७१ जनाको रिपोर्ट नेगेटिभ आएको छ । पीसीआर परीक्षण गरिएकामध्ये ४ हजार १७७ को पोजेटिभ आएको मन्त्रालयले जनाएको छ ।

मन्त्रालयका अनुसार बीपी कोइराला स्वास्थ्य विज्ञान प्रतिष्ठान धरानबाट ४० हजार ६४३, प्रदेश जनस्वास्थ्य प्रयोगशाला विराटनगरबाट ३१ हजार ३४३, कोशी अस्पताल विराटनगरबाट २५ हजार ४३६, मेची अस्पताल झापाबाट २ हजार ८९१ र अन्य प्रयोगशालाबाट ३५ जनाको परीक्षण भएको छ ।

प्रदेश १ मा मोरङमा सबैभन्दा बढी ३१ हजार २६७ जनाको परीक्षण गरिएका छ । परीक्षण गरिएकामध्ये २ हजार ४५ जनामा संक्रमण देखिएको छ । सुनसरीमा २३ हजार ६७९ र झापामा २३ हजार ५८५ जनाको परीक्षण भएको सामाजिक विकास मन्त्रालयले जनाएको छ ।

प्रदेश १ मा ४ वटा प्रयोगशालाबाट अहिले पीसीआर परीक्षण हुँदै आएको छ । बीपीमा गत चैत १८, कोशीमा चैत २९, प्रदेश जनस्वास्थ्य प्रयोगशालाले वैशाख १९ र मेची अस्पतालले साउन ३० गते बाट पीसीआर परीक्षण सुरु गरेको मन्त्रालयले जनाएको छ ।

प्रदेश एकमा कोरोना संक्रमणबाट ज्यान गुमाउनेको संख्या ४३ रहेको छ ।

Loading...