सुरु भयो अन्तर्राष्ट्रिय उडान

सुरु भयो अन्तर्राष्ट्रिय उडान

विराटनगर, १७ भदौ । कोभिड–१९ सङ्क्रमण नियन्त्रण स्वरूप गत चैत ४ देखि बन्द नियमित अन्तर्राष्ट्रिय उडान सुरु भएको छ ।

मङ्गलबार राति १ः०० बजे नेपाल वायु सेवा निगमको वाइडबडी जहाज जापानको नारिता उडेसँगै रोकिएको नियमित उडान सुरु भएको हो ।
सरकारले भदौ १६ देखि सीमित सङ्ख्यामा नियमित अन्तर्राष्ट्रिय उडान सञ्चालन गर्ने निर्णय गरेसँगै संस्कृति पर्यटन तथा नागरिक उड्डयन मन्त्रालयले गत हप्ता मात्रै नियमित अन्तर्राष्ट्रिय उडानको तालिका सार्वजनिक गरेको थियो । मन्त्रालयले तत्काल सेप्टेम्बर सम्मका लागि ५८ वटा नियमित उडानको तालिका बनाएको छ ।

सार्वजनिक गरिएको तालिकाअनुसार हरेक दिन दुईवटा नियमित अन्तर्राष्ट्रिय उडान हुनेछन् । जसमध्ये २९ उडान स्वदेशी अन्तर्राष्ट्रिय उडान सेवा प्रदायक निगम र हिमालय एयरलाइन्सको हुनेछ । बाँकी विभिन्न देशका अन्तर्राष्ट्रिय सेवा प्रदायकको हुने गरी तालिका सार्वजनिक गरिएको छ ।

मन्त्रिपरिषद्को सोमबार बसेको बैठकले यसअघि दैनिक पाँच सयभन्दा बढी यात्रु ल्याउन नपाउने सीमालाई बढाएर आठ सयसम्म यात्रु ल्याउने निर्णय गरेको छ । यसै समयमा भइरहेको उद्धार उडानसमेत जोडेर सो सङ्ख्यामा यात्रु ल्याउन सक्ने सरकारको निर्णय छ । मन्त्रालयले नियमित अन्तर्राष्ट्रिय उडानसँगै सार्वजनिक गरेको तालिकाअनुसार सेप्टेम्बरभर २७ वटा उद्धार उडान हुनेछन् ।

नियमित अन्तर्राष्ट्रिय उडानका लागि सरकारले केही विशेष नियम पनि बनाएको छ । यस्तो उडानका लागि यात्रुले ७२ घन्टाअघिको कोभिड नेगेटिभ रिपोर्ट अनिवार्य बुझाउनुपर्ने छ । यसरी परीक्षण नगरेका यात्रुसमेत मिसाएर उडान गराएमा त्यसको क्वारेन्टाइन व्यवस्थापन खर्च सम्बन्धित विमान कम्पनीले नै बेहोर्नुपर्ने छ ।

नेपाल नागरिक उड्डयन प्राधिकरणले नियमित किसिमको अन्तर्राष्ट्रिय उडानका लागि सबै तयारी पूरा भइसकेको जनाएको छ । खासगरी कोभिड सङ्क्रमणबाट बच्ने उपायसहित विमानस्थलका हरेक प्रक्रियाका लागि आवश्यकता अनुसार जनशक्ति व्यवस्थापन गरिएको प्राधिकरणका प्रवक्ता राजकुमार क्षेत्रीले जानकारी दिए ।

सरकारले नियमित तथा चार्टर्ड अन्तर्राष्ट्रिय उडानबाट नेपाल आउन पाउनेको सङ्ख्या बढाएको छ । भदौ १७ बुधबारदेखि खुल्ने उडानबाट दैनिक आठ सय जना स्वदेश आउन पाउने छन् । यसअघि सरकारले दैनिक पाँच सय मात्र आउन दिने निर्णय गरेको थियो । आजको गोरखापत्र दैनिकमा समाचार छ