आईसीयू र भेन्टिलेटर जडानका लागि दुई करोड बजेट

पाँचथर, १४ भदौ । फिदिमस्थित जिल्ला अस्पताल पाँचथरमा सघन उपचारकक्ष (आईसीयू) र भेन्टिलेटर जडानका लागि स्वास्थ्य तथा जनसंख्या मन्त्रालयले दुई करोड बजेट विनियोजन गरेको छ ।

पाँचथरबाट प्रतिनिधित्व गर्ने प्रतिनिधिसभा सदस्यसमेत रहेका भौतिक पूर्वाधार तथा यातायात एवं शहरी विकासमन्त्री वसन्तकुमार नेम्वाङको पहलमा अस्पतालमा १० शैय्याको आईसीयू तथा पाँच भेन्टिलेटर जडानका लागि बजेट विनियोजन भएको हो ।

पाँचथरसहित पूर्वी पहाडका ताप्लेजुङ, तेह्रथुम र इलाम जिल्लाका सेवाग्राही लाभान्वित हुने गरी अस्पतालको स्तरोन्नति र अत्याधुनिक सेवा विस्तार अत्यावश्यक रहेकाले संघीय सरकारबाट उक्त बजेट विनियोजन गरिएको मन्त्री नेम्वाङले बताए ।

‘कोभिड–१९ संक्रमणको महामारीले हाम्रा सबै स्वास्थ्य संस्थालाई सवल बनाउने शिक्षा दिएको छ,’ मन्त्री नेम्वाङले भने, ‘दुर्गमका बिरामीलाई टाढा पु¥याउनुपर्ने बाध्यता हटाउन उचित बजेटको प्रबन्ध गर्दै जान्छौँ ।’ मन्त्रालयबाट उक्त बजेट कार्यान्वयनका लागि अख्तियारी पठाइएको र कोभिड–१९ को महामारी लामो समय रहे संक्रमितको उपचारमा सहयोग पुग्ने मन्त्री नेम्वाङले विश्वास व्यक्त गरे ।

जिल्ला समन्वय समिति पाँचथरका प्रमुख एवं जिल्ला अस्पताल सञ्चालक समितिका संयोजक विष्णुप्रसाद सापकोटाले उपलब्ध बजेटको शीघ्र कार्यान्वयनमा जोड दिइने बताए । ‘एक त हामी महामारीसँग जुधिरहेका छौँ, अर्को हामी दुर्गममा रहेकाले अत्याधुनिक सेवा लिन लामो यात्रा गर्नुपर्ने तथा ठूलो धनराशि खर्च गर्नुपर्ने बाध्यता छ,’ सापकोटाले भने, ‘तीनै तहका सरकारको प्रयासले अस्पतालमा आधुनिक सेवा विस्तार गर्ने कार्यले पूर्णता पाउनेछ ।’

संघीय संरचनानुसार प्रदेश सरकारले जिल्ला अस्पताल सञ्चालनको जिम्मेवारी पाएको छ । हाल २० शैय्याको अस्पताल ५० शैय्या रूपान्तरित भइरहेको छ । सोअनुसार नयाँ भवन निर्माणको काम अन्तिम चरणमा पुगेको छ ।

‘आईसीयु र भेन्टिलेटर जडानका लागि बजेट प्राप्त भएपछि नयाँ भवन चाँडोभन्दा चाँडो निर्माण सम्पन्न गर्न जोड दिएका छौँ,’ जिससका प्रमुख सापकोटाले भने, ‘कामदार तथा प्राविधिकलाई कोभिड–१९ संक्रमणबाट जोगिँदै शीघ्र निर्माण सम्पन्न गर्ने तयारीमा छौँ ।’ शैय्या विस्तारसँगै चिकित्सक तथा प्राविधिक जनशक्तिसमेत थपिने सापकोटाले बताए ।

Loading...