अनुष्का निर्मित सिरियल ‘पाताललोक’मा नेपालीलाई जोडेर अपशब्द प्रयोग गरिएपछि माफीको माग

काठमाडौं, ४ जेठ । बलिउड अभिनेत्री अनुष्का शर्माले निर्माण गरेको भारतीय सिरियलमा नेपालीमाथि अपशब्द प्रयोग गरिएको विषयमा आलोचना हुन थालेको छ ।

पाताललोक नामको सिरियलमा एक महिलालाई गाली गर्नका लागि निकै नराम्रो शब्द प्रयोग गरिएको हो ।

अमेजन प्राइम सिरिजमा प्रसारण भइरहेको सिरियलको पहिलो सिजनको दोस्रो एपिसोडको ३ मिनेट ४१ औं सेकेन्डमा महिला पुलिसकर्मीले एक युवतीमाथि कुटपिट गर्दै नराम्रो शब्द प्रयोग गरिएको छ ।

यसमा प्रलक्ष नामका एक व्यक्तिले निकै लामो पोष्ट लेख्दै अनुष्का शर्माले माफी माग्नु पर्ने र उक्त सिन हटाउनु पर्ने लेखेका छन् ।

रक गायिक अभया सुब्बाले पनि प्रलक्षको पोष्ट सेयर गर्दै सिरियलमा उल्लेख गरिएको शब्दले पूरा समुदायको अपमान गरेको बताएकी छिन् ।

साथै, अनुष्का शर्माले यसको लागि माफी माग्नु पर्ने समेत लेखेकी छिन् ।

सामाजिक संजालमा यस विषयमा व्यापक चर्चा भइरहेको छ । सबैले उक्त सिन हटाएर अनुष्काले माफी माग्नु पर्ने माग गर्दै आएका छन् ।