३५ वर्षीय रोनाल्डो : ३५ खेलमा ३५ गोल

एजेन्सी, २ फागुन । इटालियन क्लब युभेन्टसका फरवार्ड क्रिस्टियानो रोनाल्डोले क्लबका पछिल्ला ८ खेलमा लगातार गोल गरेका छन् ।

बिहीबार राति एसी मिलानविरुद्ध १–१ गोलको बराबरी खेल्दा एक गोल गरेका रोनाल्डोले २०२० मा युभेन्टसका लागि ८ खेलमा लगातार गोल गरेका हुन् ।

यता, सिरी ‘ए’मा भने रोनाल्डोले लगातार १० गोलमा लगातार गोल गरेका छन् ।

कोपा इटालियाअन्तर्गत सर्वाधिक १३ पटको च्याम्पियन क्लब युभेन्टस एसी मिलानसँग १–१ गोलको बराबरीमा रोकिएको थियो ।

सेमिफाइनलको पहिलो लेगमा युभेन्टसलाई हारबाट बचाउन रोनाल्डोले गोल गरेका थिए ।

मिलानको मैदानमा भएको खेलको अन्तिम समयमा स्टार खेलाडी क्रिस्टियानो रोनाल्डोले पेनाल्टीमा गोल गर्दै युभेन्टसलाई हारबाट जोगाए ।

१–० गोलले पछि परेको अवस्थामा युभेन्टसले पेनाल्टीको अवसर पाएको थियो । जसमा, रोनाल्डोले गोल गरे ।

यस गोलसँगै रोनाल्डोले यस वर्ष लगातार ८ खेलमा १२ गोल गरेका छन् ।

३५ वर्षीय रोनाल्डोले यो सिजन क्लब र देशका लागि ३५ खेल खेल्दा ३५ नै गोल गरेका छन् ।

उनले देशका लागि ११ गोल गरेका छन् भने युभेन्टसका लागि २४ गोल गरेका छन् ।

उनले युरोकप छनौटमा ११ गोल गर्दा सिरी ‘ए’ मा २०, च्याम्पियन्स लिगमा २ र कोपा इटालियामा २ गोल गरेका छन् ।

Loading...