अस्ट्रेलियामा आगो निभाउन उडेको विमान दुर्घटना, तीन अमेरिकीको मृत्यु

सिड्नी, ९ माघ । अस्ट्रेलियाको सिडनीबाट दक्षिणपश्चिमी भागमा आगो निभाउने कार्यमा खटिएको एउटा ट्याँकर विमान दुर्घटना हुँदा तीन अमेरिकीको मृत्यु भएको छ ।

विहीबार उक्त विमान दुर्घटनाग्रस्त हुँदा विमानमा सवार चालक दलका तीन जना अमेरिकीको मृत्यु भएको अधिकारीहरूले जानकारी दिएका छन् । न्यू साउथ वेल्सको ग्रामीण अग्निनियन्त्रण सेवाका आयुक्त शेन फिट्सिमन्सले क्यानाडाली कम्पनीको सी–१३० हर्कुलस विमानसँग स्थानीय समयअनुसार बिहीबार अपराह्न १.३० बजे सञ्चार सम्पर्कविच्छेद भएको बताए ।

उक्त जहाज स्लोई मोनारो क्षेत्रमा खटिएको थियो । फिट्सिमन्सले दुर्घटनामा चालक दलका तीनै जना सदस्यको मृत्यु भएको र उनीहरू संयुक्तराज्य अमेरिकाका बासिन्दा रहेको जानकारी दिए ।

अष्ट्रेलियाको जंगलमा लागेको विनाशकारी डढेलो नियन्त्रणमा सघाउन उनीहरुलाई संयुक्तराज्य अमेरिका सरकारले खटाएको थियो । उनले मारिने तीनै जना निकै अनुभवी रहेको पनि बताए ।

गतवर्ष सेप्टेम्बरमा शुरु भएको यस विनाशकारी डढेलोमा परेर कम्तीमा ३२ जनाको मृत्यु भइसकेको छ । यस दुर्घटनाको कारण तत्कालै थाहा हुन सकेको छैन, तर फिट्सिमन्सले तीव्र बेगको हावाका कारण पानी बोक्ने ठूला जिमानको उडानलाई “धेरै गाह्रो” बनाइरहेको बताएका थिए ।

विमानको स्वामित्व रहेको क्यानाडाली फर्म कउल्सन एभिएसनले न्यू साउथ वेल्स र भिक्टोरियामा आगलागी नियन्त्रणमा प्रयोग गरिरहेका अन्य ठूला एयर ट्याङ्कर संचालनलाई तत्काल स्थगन गरेको जनाएको छ । रासस

Loading...