fbpx

अन्नपूर्ण हाम्रो पूर्वाञ्चल गोल्डकप : सडन डेथमा एपीएफलाई हराउँदै पुलिस सेमिफाइनलमा

विर्तामोड १९ कात्तिक । झापाको विर्तामोडमा जारी अन्नपूर्ण हाम्रो पूर्वाञ्चल गोल्डकपमा नेपाल पुलिस क्लबले जित निकालेको छ । मंगलबार भएको दोस्रो क्वार्टरफाइनल खेलमा सशस्त्र प्रहरी बलको एपिएफ क्लबलाई सडन डेथमा हराउँदै पुलिसले सेमिफाइनलमा स्थान बनाएको हो ।

झापाको विर्तामोडस्थित डोमलाल राजवंशी रंगशालामा भएको विभागीय डर्बीमा निर्धारित समय १–१ गोलको बराबरीमा सकिएको थियो । त्यसपछि खेल पेनाल्टी सुट आउटमा गएपनि पुनः बराबरी भयो । र, त्यसपछि खेलमा सडन डेथको निर्णय लिइएको थियो, जसमा पुलिसले जित हात पारेको हो ।

aa

खेलमा एपीएफले सुरुआती अग्रता बनाएको थियो । एपीएफका लागि रमेश दंगालको गोलमा एपीएफले सुरुआती अग्रता बनाएको हो । रमेशले खेलको २९औं मिनेटमा हेडिङमार्फत् गोल गरेका थिए । नवीन लामाको पासमा रमेशले गोल गरेपछि एपीएफले पहिलो हाफभरि १–० गोलको अग्रता बनायो ।

यस्तै खेलको ६०औं मिनेटमा भोला सिलवालको गोलमा पुलिस बराबरीमा फर्कियो । त्यसपछि निर्धारित समयमा दुवैले गोल गर्न सकेनन् र खेलमा पेनाल्टी सुटआउटको निर्णय लिइएको थियो । त्यसमा पनि खेल बराबरी भएपछि पुनः खेलमा सडन डेथको निर्णय लिइएको थियो । जसमा पुलिसले सफलता हात पारेको हो ।

योसँगै दोस्रो जित निकाल्दै पुलिसले सेमिफाइनलमा स्थान बनायो । पुलिसले समूह ‘बी’को पहिलो खेलमा झापा ११ लाई पराजित गरेको थियो । समूह ‘ए’ बाट सोमबार पाहुना टोली सिक्किम आक्रामक क्लब सेमिफाइनल प्रवेश गरिसकेको छ ।

उक्त खेलमा म्यान अफ दि म्याच पुलिसका भरत सिलवाल बने । अब प्रतियोगिताअन्तर्गत भोलिको खेलमा आसाम र त्रिभुवन आर्मी क्लबले खेल्नेछन् ।

Loading...