fbpx

फूल टिपेको निहुँमा वडाअध्यक्षले बालकलाई अस्पताल भर्ना हुनेगरी कुटे

दाङ,
फूल टिपेको निहुँमा वडाअध्यक्षले बालकलाई अस्पताल भर्ना हुनेगरी कुटेका छन् । दाङको घोराही उपमहानगरपालिका–४ का वडाअध्यक्ष भीमबहादुर सार्कीले फूल टिपेको निहुँमा घोराही उपमहानगरपालिका–४ गोग्ली शान्तिनगरका नौ वर्षीय बालक भरत घर्तीमाथि कुटपिट गरेका हुन् ।

बुधबार बेलुका वडाध्यक्षको घर अगाडि खेलिरहेका केही बालबालिकामध्ये बालक घर्तीले फूल टिपेको आरोपमा अध्यक्ष सार्कीले कुटपिट गरी घाइते बनाएको बालकका आमा रैमता घर्तीले बताइन् । आफ्नो घर अगाडिको फूल टिपेको आरोपमा उनले बालक कुटेका हुन् । कुटपिटबाट उनको बायाँ कान र पेटमा चोट लागेको बालकले बताएका छन्। उनको बायाँ गालामा निलडामसमेत देखिएको छ ।

बालक घर्तीको घोराही नयाँबजारस्थित नयाँबजार नाक, कान, घाँटी तथा डेन्टल केयर सेन्टरमा भर्ना गरेर उपचार गरिएको छ । बालकको कानमा केही फोहरसमेत जम्मा भएका कारण जालीको अवस्था के छ भन्नेबारेमा एक सातापछि फोहर निकालेर मात्रै भन्न सकिने डाक्टर विक्रम बुढाथोकीले बताए । बालकको कानको अवस्था गम्भीर नभए पनि जालीमा समस्या छ छैन भन्नेबारेमा एक सातापछि मात्रै थाहा हुने उनको भनाइ छ ।

रातभर कान दुखेर बालक छट्पटाएपछि बिहान अस्पताल लिएर आएको आमा रैमता घर्तीले बताइन् । वडाध्यक्षले उपचार खर्च दिनुको साटो फूल टिपेको पाँच हजार मागेकोसमेत घर्तीको भनाइ छ। तर बालकले फूल नै नटिपेको बताए । उता वडाध्यक्ष सार्कीले बदमासी गरेका कारण सम्झाउँदै सामान्य एक थप्पड टाउकामा हानेको स्वीकार गरेका छन्। उनले उपचारका लागि खर्च दिनेसमेत बताए । रासस

प्रतिक्रिया

Loading...