fbpx

‘रोनाल्डोलाई युनाइटेडले सुपरस्टार बनाएको हो’

एजेन्सी,
इंग्लिस क्लब म्यानचेष्टर युनाइेटका पूर्वमिडफिल्डर जोनाथन स्पेक्टरले पोर्चुगिज फरवार्ड क्रिस्टियानो रोनाल्डो युनाइटेड आउँदा एक निराशाजनक खेलाडी रहेको बताएका छन् । ३३ वर्षीय अमेरिकन खेलाडी जोनाथनले अमेरिकन ग्याम्बलर डटकमसँगको कुराकानीमा यस्तो बताएका हुन् ।

उनले ओल्ड ट्राफोर्ड आउँदा रोनाल्डो एक निराशाजन खेलाडी भएको र उनाई सुपरस्टार बनाउने श्रेय युनाइटेडलाई जाने बताए । उनका अनुसार रोनाल्डोलाई विश्वको उत्कृष्ट खेलाडी बनाउने काम युनाइटेडले गरेको हो ।

रोनाल्डो सन् २००३ मा युनाइटेडमा आएका थिए । त्यसअघि उनले स्पोर्टिङ सीपीबाट खेलेका थिए । युनाइटेडले तीन प्रिमियर लिग र एक च्याम्पियन्स लिगको उपाधि जित्दा उनले महत्त्वपूर्ण भूमिका निभाएका थिए । यसै उपलब्धीका साथसाथै रोनाल्डोले सन् २००८ मा पहिलो बालोन डी‘ओर जितेका थिए ।

हालसम्म पाँच पटकका बालोन डी‘ओरका विजेता रहेका रोनाल्डोलाई उनका पूर्व सहकर्मी जोनाथन विश्वका उत्कृष्ट खेलाडी भन्न रुचाउँछन् । उनी भन्छन्, ‘मेरो विचारमा अहिले उनी सबै खेलाडीका प्रेरणाको स्रोत बन्न सक्छन् । तर, उनी युनाइटेड आउँदा निराश थिए । उनीसँग धेरै क्षमता थियो तर, उनी स्टार बनिसकेका थिएनन् ।’

‘सर एलेक्स फर्गुसनले धेरै राम्रो काम गरेका छन्,’ उनले थपे, ‘ फर्गुसनले सबै खेलाडीलाई सहयोग गरे र राम्रा खेलाडी उत्पादन गरे । उनले रोनाल्डोलाई पनि एक उत्कृष्ट खेलाडी बनाएरै छोडे । रोनाल्डो धेरै नै खास खेलाडी भए ।’

यसैगरी, जोनाथनले त्यतिबेला रोनाल्डालाईे फर्गुसनले प्रयत्न नगरेको भए अहिले उनी प्रख्यात खेलाडी हुनै नसक्ने बताए । उनले भने, ‘फर्गुसनले रोनाल्डोलाई सुपरस्टार बनाउन अनेक गरेका थिए । यो एकदमै हाँस्यास्पद छ कि, फर्गुसनले यो कुरा मलाई कहिल्यै भनेका थिएनन् । मेरो विचारमा फर्गुसन पनि रोनाल्डोका लागि एकदमै खास छन् ।’

पाँच पटकका बालोन डी‘ओर विजेता रोनाल्डो हाल इटालियन क्लब युभेन्टसबाट व्यवसायीक फुटबल खेलिरहेका छन् । उनी सन् २०१८–१९ को सिजनमा स्पेनिस महारथी क्लब रियल मड्रिडबाट इटाली आएका हुन् । रियल मड्रिडमा छँदा उत्कृष्ट प्रदर्शन गरेका उनले इटाली आइकन पनि आफ्नो उच्च प्रदर्शनलाई निरन्तरता दिइरहेका छन् । ३३ वर्षीय रोनाल्डोले स्पेन, इंग्ल्याण्ड र इटाली गरी तीनै देशबाट ट्रफी जितेका छन् ।

Loading...