fbpx

दुई करोड ११ लाखको अक्षयकोष स्थापना

बाबुराम बास्तोला
संखुवासभा, पुस २७
जेहन्दार विध्यार्थीलाई अध्ययनमा सहयोग पुर्याउने उद्देश्यले संखुवासभामा अहिलेसम्म दुई करोड ११ लाख ५० हजार नौ सय ९९ रुपैयाँ बराबरको अक्षयकोष स्थापना गरिएको छ । एक सय २८ विध्यालयमा व्यक्तिगत रूपमा छात्रवृत्ति दिने उद्देश्यले उक्त रकम राखिएको जिल्ला शिक्षा कार्यालयले जनाएको छ ।

जिल्लाका तीन सय ७७ सामुदायिक विध्यालयमध्ये एक सय २८ विध्यालयमा सो रकम राखिएको छ । त्यसमा पनि आफन्तको नाममा अक्षयकोष स्थापना गरी विध्यालयमा रकम राख्ने प्रचलन संखुवासभामा बढेको छ । रकमको ब्याजबाट गरिब तथा जेहन्दार विध्यार्थीलाई छात्रवृत्ति प्रदान गरिँदै आएको छ । उक्त रकमबाट वार्षिक २५ लाख ९९ हजार तीन सय रुपैयाँ ब्याज संकलन हुने जिल्ला शिक्षा कार्यालयका विध्यालय निरीक्षक सन्तोष बरालले बताए । शारदा माध्यमिक विध्यालय उम्लिङमा मात्र सातवटा छात्रवृत्ति कोष रहेको पाइएको छ ।

संखुवासभामा २०४७ सालमा भगवति निम्न माध्यमिक विध्यालय, पुलुङ मादीमा टोकादल स्मृति पुरस्कारको नाममा एक हजार सात सय ८० रुपौयाँको कोष स्थापना भएदेखि निरन्तर दाताहरूले रकम जम्मा गर्दे आएका छन् । मादि माध्यमिक विध्यालयमा मात्र छात्रवृत्ति दिने उद्देश्यले स्थापित अक्षयकोषमा ४० लाख १४ हजार पाँच सय २२ रुपैयाँ रहेको छ । जिल्ला शिक्षा कार्यालयले भने एकै  विध्यालयमा १२ वटासम्म अक्षयकोषको खाता रहेको जनाएको छ ।

प्रतिक्रिया

Loading...