Nepali News Portal

कालोसूचीमा नरहेका बंगलादेशका कलेजमा नेपाली विद्यार्थी जान सक्ने

0

 

काठमाडौँ, मङ्सिर ११
नेपाल शैक्षिक परामर्श संघ (इक्यान)ले चिकित्सा शिक्षाका लागि बंगलादेशका सबै मेडिकल कलेजमा नेपाली विद्यार्थीको भर्नामा रोक नलगाइएको जनाएको छ ।

आज यहाँ पत्रकार सम्मेलन गरी इक्यानले बंगलादेशका २१ मेडिकल कलेजमा मात्र भर्नामा रोक लगाइएको जनाएको हो । शिक्षा मन्त्रालय र नेपाल मेडिकल काउन्सिलले सम्बन्धित मुलुकको आधिकारिक निकायसँगको समन्वयमा केही कलेजमा मात्र भर्नामा रोक लगाइएकाले अन्य कलेजमा नियमितरुपमा नेपाली विद्यार्थी जान सक्ने इक्यानका अध्यक्ष प्रकाश पाण्डेले बताए । बंगलादेश सरकारले गुणस्तर र पूर्वाधारका विषयमा प्रश्न उठाएपछि ती २१ कलेजमा भर्नामा रोक लगाइएको हो ।

बंगलादेशमा करिब १५० मेडिकल कलेज छन् । यहाँ हाल करिब दुई हजार पाँच सय नेपाली विद्यार्थी अध्ययनरत छन् । नेपालका ३० शैक्षिक परामर्श केन्द्रले बंगलादेशका विश्वविद्यालयसँग काम गर्छन् । बंगलादेश जाने नेपाली विद्यार्थीको संख्या बढिरहेको समयमा कुनैपनि कलेजमा पढ्न नपाउने भन्ने भ्रममा नपर्न संघले आग्रह गरेको छ । इक्यानका उपाध्यक्ष विष्णुहरि पाण्डेकाअनुसार हरेक वर्ष करिब ५०० विद्यार्थी एमबिबिएस अध्ययनका लागि बंगलादेश जाने गर्छन् । संघका पूर्व अध्यक्ष राजेन्द्र बरालले हाल कालोसूचीमा रहेका कलेज बन्द नरहे पनि अन्तर्राष्ट्रिय विद्यार्थीको भर्ना केही समयका लागि रोकिएको बताए ।

यो पनि हेर्नुहोला:
Comments
Loading...