Rumpum Advertisement
Dazzu

सुदूरपश्चिमका सामाजिक विकासमन्त्रीलाई कोरोना संक्रमण

सुदूरपश्चिमका सामाजिक विकासमन्त्रीलाई कोरोना संक्रमण

कञ्चनपुर, २ मंसिर । सुदूरपश्चिम प्रदेशका सामाजिक विकासमन्त्री कृष्णराज सुवेदीलाई कोरोना भाइरस संक्रणको पुष्टि भएको छ । मन्त्री सुवेदीलाई ज्वरो र रुघाखोकीको लक्षण देखिएपछि नमूना परीक्षण गराउँदा सोमबार कोरोना पोजेटिभ देखिएको उनका स्वकीय सचिव लोकेन्द्र धामीले र जानकारी दिए ।

कोरोनाको संक्रमण देखिएपछि होम आइसोलेसनमा बसेका मन्त्री सुवेदीको स्वास्थ्य अवस्था सामान्य रहेको धामीले बताए । यसअघि मन्त्री सुवेदीका अर्का स्वकीयसचिव र दुई सुरक्षा गार्डमा समेत कोरोना संक्रमण देखिएको थियो ।

प्रदेशका आन्तरिक मामिला तथा कानूनमन्त्री प्रकाशबहादुर शाह कोरोना संक्रमित भई हाल काठमाडौँमा उपचाररत छन् । गएको कात्तिक १५ गते उनमा कोरोना संक्रमण पुष्टि भएको थियो । उनका स्वकीय सचिव जंगबहादुर विकले मन्त्री शाहको स्वास्थ्यमा सुधार भइरहेको जानकारी दिए ।

सुदूरपश्चिममा संक्रमितको संख्या १० हजार नाघ्यो

सुदूरपश्चिम प्रदेशमा कोभिड–१९का कूल संक्रमित १० हजार ५३५ पुगेका छन् । तीमध्ये आठ हजार ८१३ संक्रमित उपचार व्यवस्थापनपछि डिस्चार्ज भएका छन् । सेती प्रादेशिक अस्पतालको सघन उपचारकक्ष (आइसीयू)मा पाँचजना उपचाररत छन् ।

सामाजिक विकास मन्त्रालयको तथ्यांकअनुसार प्रदेशमा यो रोगको संक्रमणबाट अहिलेसम्म ३१ जनाको मृत्यु भएको छ । सबैभन्दा बढी प्रदेशको राजधानी जिल्ला कैलालीमा १७ जनाको मृत्यु भएको छ । यस्तै बझाङमा तीन, अछाम, बाजुरा, कञ्चनपुर र डडेलधुरामा दुई÷दुई र बैतडी, दार्चुला र डोटीमा एक÷एक जनाको मृत्यु भएको छ ।

पछिल्लो दुई हप्तायता सुदूरपश्चिम प्रदेशमा कोरोना भाइरसबाट मृत्यु हुने दर बढ्दै गएको छ । यो अवधिमा आठ संक्रमितको मृत्यु भएको छ । संक्रमितमध्ये होम आइसोलेसनमै मृत्यु हुने कतिपयको तथ्यांक भने मन्त्रालयसँग छैन । तोकिएको स्वास्थ्य सुरक्षाका मापदण्ड नअपनाई सर्वसाधारणको चहलपहल बढ्दा कोरोना फैलिने जोखिम थप बढेको स्वास्थ्यकर्मीको भनाइ छ । रासस

प्रतिकृया दिनुहोस्:

तपाईको ईमेल गोप्य राखिनेछ