Rumpum Advertisement
Dazzu

विराटनगरमा थप चार कोरोना संक्रमितको मृत्यु

विराटनगरमा थप चार कोरोना संक्रमितको मृत्यु

विराटनगर, २३ कात्तिक । कोरोना संक्रमणका कारण विराटनगरमा थप चारजनाको मृत्यु भएको छ । मोरङका विभिन्न कोभिड अस्पतालमा उपचाररत चारजना कोरोना संक्रमितको मृत्यु भएको हो ।

मोरङको बूढीगंगा गाउँपालिकामा रहेको विराट शिक्षण अस्तपालमा दुई, नोबेल शिक्षण अस्पतालमा एक र म्याक्स अस्पतालमा एकजनाको ज्यान गएको हो । मृत्यु भएकामध्ये एकजना वृद्ध महिला र तीनजना पुरुष छन् ।

विराट शिक्षणमा मोरङको केराबारीका पुरुष र सुनसरीको धरानकी वृद्धाको ज्यान गएको छ । अस्पतालका आइसोलेसन इन्चार्ज सुनिल देवका अनुसार केराबारी गाउँपालिका–३ का ५९ वर्षीय पुरुषको आइतबार बिहान १०ः३० बजेतिर मृत्यु भएको छ ।

कोरोना संक्रमणसँगै श्वासप्रश्वासमा समस्या भएपछि उनलाई उपचारका लागि कात्तिक ११ गते अस्पतालको आइसोलेसनमा भर्ना गरिएको देवले बताए ।

कोभिड अस्पतालको आइसोलेसनमा भर्ना गरेर उपचार थालिएको १२ दिनपछि पुरुषको ज्यान गएको हो । देवका अनुसार मृतकमा निमोनिया, मधुमेह र उच्च रक्तचापको पुरानै समस्या थियो ।

विराटमै सुनसरीको धरान उपमहानगरपालिका–१ की ७२ वर्षीया वृद्धा महिलाको बिहान ८ः३० बजेतिर मृत्यु भएको छ ।

कोरोना संक्रमण पुष्टि भएपछि कात्तिक १४ गते वृद्धालाई उपचारका लागि अस्पताल भर्ना गरिएको जानकारी देवले दिए । उनका अनुसार मृतकमा निमोनियासँगै फोक्सो, मृगौला र मुटुको पुरानै समस्या थियो ।

विराटनगरको म्याक्स अस्पतालमा झापाको दमक नगरपालिका–६ का ८३ वर्षीय वृद्ध पुरुषको दिउँसो १ः३० बजेतिर मृत्यु भएको छ । अस्पतालका प्रशासन प्रमुख हेमनारायण मेहताका अनुसार कोरोना संक्रमणसँगै ज्वरो आउने र श्वासप्रश्वासको समस्या थपिएपछि वृद्धलाई उपचारका लागि कात्तिक १२ गते अस्पताल भर्ना गरिएको थियो ।

विराटनगरकै नोबेल शिक्षण अस्पतालमा विराटनगर महानगरपालिका–९ का ६८ वर्षीय पुरुषको मृत्यु भएको छ । बिहान ९ बजेतिर मृत्यु भएको अस्पतालका प्रबन्धक नारायण दाहालले जानकारी दिए । उनका अनुसार कोरोना पुष्टि भएपछि वृद्धलाई कात्तिक २० गते उपचारका लागि अस्पताल भर्ना गरिएको थियो । मृतकमा मधुमेह र उच्च रक्तचापको पुरानै समस्या रहेको दाहालले बताए ।