Rumpum Advertisement
Dazzu

थलिएको पर्यटन मुर्झाउन ‘नेपाल साइकल यात्रा’

थलिएको पर्यटन मुर्झाउन ‘नेपाल साइकल यात्रा’

काठमाडौ, १७ कात्तिक । कोभिड–१९ का कारण थला परेको पर्यटन क्षेत्रको पुनःस्थापित गर्नका लागि ‘नेपाल साइकल यात्रा’ गरिएको छ ।

नेपाल पर्यटन बोर्डको प्रबद्र्धन तथा ट्रेकिङ एजेन्सीज एसोसिएसन अफ नेपाल (टान), नेपाल एसोसिएसन अफ टुर्स एन्ड ट्राभल एजेन्ट (नाट्टा), नेपाल पर्वतारोहण संघ (एनएमए) को सहयोगमा नेपाल साइकल यात्रा गरिएको हो ।

नेपाल साइकल यात्रा समूहले आज नेपाल पर्यटन बोर्ड भृकुटीमण्डपबाट साइकल यात्रा सुरु गरेको हो । उक्त समूहलाई पर्यटन बोर्डका प्रमुख कार्यकारी अधिकृत डा. धनञ्जय रेग्मीले बिदाइ गरेका छन् ।

साइकल यात्रा समूहले पश्चिमको महेन्द्रनगरदेखि पूर्वको पशुपतिनगरसम्म साइकल यात्रा गर्ने नेपाल साइकल यात्रा मेला–२०७७ का संयोजक पुष्कर शाहले जानकारी दिए ।

आन्तरिक पर्यटन प्रबद्र्धनका लागि सुरु भएको यात्रा महेन्द्रनगरबाट सुरु भई ठाकुरद्वार, नेपालगञ्ज, वीरेन्द्रनगर, घोराही, स्वर्गद्वारी, तौलिहवा, भैरहवा, बुटवल, तानसेन, पोखरा, नारायणघाट, हेटौँडा, वीरगञ्ज, लालबन्दी, जनकपुर, गाईघाट, धरान, विराटनगर हुँदै काँकरभिट्टासम्म पुग्नेछ । उक्त समूह तीन हप्ताको साइकल यात्रापश्चात् काठमाडौँ फर्कनेछ ।

नेपाल पर्यटन बोर्डका सदस्य दीपक महतले कोभिड–१९ ले आक्रान्त पारेको नेपालको पर्यटनलाई पुनःजीवन प्रदान गर्ने उद्देश्यसहित आन्तरिक पर्यटन प्रबद्र्धन गर्न र बोर्डको सन्देशलाई देशव्यापीरुपमा प्रवाह गर्न यो साइकल यात्राले मद्दत पुग्ने बताए ।

साइकल समूहमा संयोजक शाहसहित पर्यटन व्यवसायी राजेन्द्र सापकोटा, शंकर अधिकारी, सुभास केसी, मुक्ति पाण्डेलगायत छन् । साइकल यात्राको दुरी एक हजार ६२४ किलोमिटर हुनेछ ।