Rumpum Advertisement

अब डिजे साउण्ड सिस्टम प्रयोग गर्न नपाइने

Neuro Revised Adv
Koshi Dashain ad
अब डिजे साउण्ड सिस्टम प्रयोग गर्न नपाइने

सर्लाही, २३ असोज । सर्लाहीमा डिजे साउण्ड सिस्टम प्रयोग गर्न प्रतिबन्ध लगाइएको छ । अब जिल्लाभित्र हुने धार्मिक, सामाजिक, राजनीतिकलगायतका कार्यक्रममा डिजे साउण्ड सिस्टम प्रयोग गर्न नपाइने भएको छ ।

डिजे साउण्ड सिस्टमले चर्को ध्वनि प्रवाह हुनाका साथै ध्वनि प्रदूषण, स्वास्थ्य समस्या, शान्ति सुरक्षामा असर र सामाजिक सद्वाभावमा समेत असर पारेको भन्दै जिल्ला प्रहरी कार्यालयले आफ्नो क्षेत्रभित्र सो सिस्टम प्रयोगमा प्रतिबन्ध लगाएको हो ।

प्रहरी प्रमुख तथा प्रहरी उपरीक्षक सन्तोषसिंह राठौरका अनुसार जिल्ला सुरक्षा समिति, जिल्लास्तरीय सर्वदलीय र सर्वपक्षीय बैठक तथा स्थानीय तहका प्रमुखहरूको संयुक्त बैठकले जिल्लाभित्र डिजे साउण्ड प्रयोगमा प्रतिबन्ध लगाउन सिफारिस गरेको हो ।

यस्ता साउण्ड सिस्टमले दुर्घटनासमेत बढाउने भएकाले जिल्लाका कुनै पनि स्थानमा यस्तो स्पिकर राख्न नदिन स्थानीय प्रशासन ऐन २०२८ बमोजिम आदेश जारी गरिएको प्रमुख जिल्ला अधिकारी सुरेन्द्र पौडेलले जानकारी दिए ।

ठूलो स्वारमा डिजे साउण्ड सिस्टम बजाउने र अस्लील खालमा गीत संगीत बजाउने गर्दा समाजमा विकृति फैलँदै गएकाले बाध्य भएर यस्तो निर्णय गरिएको जिल्ला समन्वय समितिका सभापति मेथुर चौधरीले बताए ।

उक्त आदेशको बर्खिलाप गरेको पाइएमा सो सिस्टम जफत गर्नाका साथै प्रचलित कानून मोजिम कारवाही गरिने भएको छ । रासस