Rumpum Advertisement

पार्टी प्यालेस सञ्चालन गर्न पाउनु पर्ने व्यवसायीको माग

Neuro Revised Adv
Koshi Dashain ad
पार्टी प्यालेस सञ्चालन गर्न पाउनु पर्ने व्यवसायीको माग

काठमाडौ, १८ असोज । पार्टी प्यालेस व्यवसायीहरुले तत्काल व्यवसाय सञ्चालन गर्ने वातावरण बनाइदिन सरकारसँग माग गरेका छन् ।

देशभर रहेका सात हजार पार्टी प्यालेस व्यवसाय बन्द हुँदा ५० हजारभन्दा बढीको रोजगारी गुमेको र लाखौंको संख्यामा जनजीवन प्रभावित भएको भन्दै व्यवसायीहरुले तत्काल व्यवसाय सञ्चालन गर्ने वातावरण बनाइदिन सरकारसँग माग गरेका हुन् ।

नेपाल राष्ट्रिय पार्टी प्यालेस तथा क्याटरिङ व्यवसायी महासंघका केन्द्रीय अध्यक्ष लिलाबहादुर जिसीले राज्यले तत्काल निर्वाध रुपमा पार्टी प्यालेस तथा क्याटरिङ व्यवसाय सञ्चालन गर्ने वातावरण बनाउन माग गरे । अध्यक्ष जिसीले होटल तथा रेस्टुरेन्ट व्यवसाय सञ्चालन गर्न दिने तर पार्टी प्यालेस व्यवसाय सञ्चालन गर्न नदिने कुरा नमिल्दो भएको बताए ।

भौतिक दुरी कायम गर्दै सरकारले तोकेको मापदण्ड पूरा गरेर व्यवसाय सञ्चालन गर्न माग गर्दासमेत व्यवसाय बन्द गरिनुको कारण सरकारले स्पष्ट पार्नुपर्ने बताए । उनले पार्टी प्यालेस खोल्दा संक्रमण फैलिन्छ भन्ने भ्रममा सरकार रहेको बताए । ठूला होटल तथा रेष्टुरेन्टका पार्टीहलहरु सञ्चालन हुँदा कोरोना नसर्ने तर पार्टी प्यालेसका हल सञ्चालन गर्दा कोरोना सर्ने कुरा आफूहरुले नमान्ने पनि अध्यक्ष जिसीले बताए ।

नेपाल राष्ट्रिय पार्टी प्यालेस तथा क्याटरिङ व्यवसायी महासंघका प्रवक्ता कृष्णप्रसाद पाण्डेले करिब सात महिनायता पार्टी प्यालेस बन्द हुँदा व्यवसायबाट नै पलायन हुने स्थितिमा आफूहरु पुगेको बताए । अहिले देशभर दुई सयभन्दा बढी व्यवसायीहरु पलायन भइसकेको बताउँदै अझ बढी क्षति हुने देखिएको बताए । ५० हजारभन्दा बढीको रोजगारी गुम्ने मात्र नभएर सरकारले वार्षिक दुई अर्बभन्दा बढी राजश्वसमेत गुमाएको उनको भनाइ छ ।

त्यस्तै पछिल्लो समय आफूहरुसँग कर्मचारीका लागि तलब खुवाउनसमेत पूँजीको अभाव भएको उनले बताए । त्यसबाहेक पार्टी प्यालेस व्यवसाय सञ्चालन नहुँदा कृषि उत्पादनको खपत घटेको र बजारमा महँगी बढेको उनले दावी गरे ।

प्रवक्ता पाण्डेका अनुसार कुल कृषि उत्पादनको २५ प्रतिशत पार्टी प्यालेस व्यवसायमा खपत हुँदै आएको छ । यसबाट अप्रत्यक्षरुपमा लाखौंको रोजगारी प्रभावित भएको उनले बताए । बैंकबाट ऋण लिएर व्यवसाय सञ्चालन गरेकाहरु सबैभन्दा बढी समस्यामा परेको पनि उनले बताए । अन्य उद्योग व्यवसायसरह यो व्यवसायलाई लिन पनि प्रवक्ता पाण्डेले सरकारसँग आग्रह गरे । संकटको बेला पार्टी प्यालेस व्यवसायीहरुले सरकारबाट कुनै पनि राहत पाउन नसकेको गुनासो उनको छ ।

व्यवसायीहरुले आफूहरु कोरोना संक्रमणको जोखिम न्यूनीकरणका लागि सरकारले तोकेको मापदण्डसहित उच्च सतर्कता अपनाएर व्यवसाय सञ्चालन गर्न सक्षम रहेको पनि बताएका छन् । सरकारले आर्थिक कारोबारलाई चलायमान गराउन र व्यवसायबाट पलायन हुने स्थिति आउन नदिन पनि व्यवसाय सञ्चालन गर्न दिनु पर्ने व्यवसायीहरुले बताएका हुन् ।